Azərbaycan, Bakı, 25 iyul /Trend, müxbir N.İsmayılova/
Azərbaycan Əmanətlərin Sığortalanması Fondunun (ADİF) üzv banklarında fiziki şəxslərin ümumi depozitləri ilin birinci yarısının yekunlarına görə, 3,381 milyard manat təşkil edərək ikinci rüb ərzində 6,6 faiz artıb. Bu barədə bazar ertəsi Trend-ə Fondun icraçı direktoru Azad Cavadov deyib.
Bu həcmdən 2,23 milyard manat (14,8 faiz) sığortalanmış əmanətlərə aiddir. Hesabat dövrünə olan məlumata görə, sığortalanmış əmanətlərin sayı 5 423 min nəfər təşkil edib.
Fonda üzv 43 bank tərəfindən ilin birinci yarısında həyata keçirilən təqvim ödənişləri 1 milyon 226 min manat, 1 milyon 392 min dollar və 181 min avro təşkil edib.
Fondun sığorta ehtiyatları ikinci rüb ərzində 7,2 faiz artaraq 37 milyon manat təşkil edib.
2010-cu il iyunun 1-dən ADIF-in üzv banklarında 12 faizdən çox illik faizlə yerləşdirilən depozitlər Fond tərəfindən sığortalanmır və onlar üzrə kompensasiyaların ödənilməsi nəzərdə tutulmur.
Hazırda əmanət üzrə sığorta ödənişinin maksimal səviyyəsi 30 min manatdır. Əmanətçilər öz əmanətlərini sığorta etdirmək üçün heç bir ödəniş etmirlər, sığorta ödənişləri yalnız banklar tərəfindən həyata keçirilir.
İyulun 25-nə olan rəsmi məzənnə 0,7865 AZN/USD təşkil edir.
