Azərbaycan, Bakı, 5 avqust /Trend, müxbir İ.Xəlilova/
Son 5 ildə Azərbaycan manatı təxminən 28 faiz bahalaşıb.
"2007-ci ildən Azərbaycanın milli valyutası təxminən 28 faiz bahalaşıb. Bu onu göstərir ki, ölkə öz rəqabət qabiliyyətini qorumaq üçün istehsalın səmərəliliyinin artırılmasına xüsusi diqqət yetirməlidir", - cümə günü Trend-ə Dünya Bankının Bakı nümayəndəliyindəki mənbə Azərbaycanda aparılan məzənnə siyasətinin səmərəlilik məsələsini şərh edərkən deyib.
DB mütəxəssislərinin fikrincə, kənd təsərrüfatı məhsullarının dünya bazarlarında rəqabətqabiliyyətliliyinin təmini üçün yeni texnologiyalar və istehsal üsullarına ehtiyac var.
"Bununla əlaqədar ölkənin birbaşa xarici investisiyalara ehtiyacı var, çünki məhz investiyalar əsasən yeni texnologiya və üsullarla, eləcə də binesin aparılması qaydaları ilə müşayiət edilir", - mənbə qeyd edib.
Trend-ə Azərbaycan Mərkəzi Bankından bildirildiyinə görə, ölkə iqtisadiyyatının beynəlxalq rəqabətqabiliyyətinin təmin edilməsi məqsədilə Azərbaycan Mərkəzi Bankı (AMB) manatın məzənnəsinin kəskin möhkəmlənməsinə yol verməməyə çalışacaq.
"Mərkəzi Bankın 2011-ci il üçün prioritetləri nəzərə alınmaqla AMB inflyasiya və maliyyə sabitliyi üzrə manatın məzənnəsinin stabil saxlanılması siyasətini aparacaq. Bu məqsədlərin həyata keçirilməsi üçün lazım olacağı təqdirdə ölkənin valyuta bazarında tələb və təklif arasında tarazlığın yaradılması üzrə iş aparılacaq", - AMB-dən qeyd edilib.
2009-cu ilin yekunlarına görə, Azərbaycanın milli valyutasının məzənnəsi 1,8 faiz, 2010-cu ildə 0,6 faiz, 2011-ci ilin əvvəlindən 1,4 faiz möhkəmlənib.