Azərbaycan, Bakı, 9 avqust /Trend, müxbir İ.Xəlilova/
Sentyabrda Gəncə və Şəki şəhərlərində "Kadastr və daşınmaz əmlakın qeydiyyatı" layihəsinin hazırlığı başa çatacaq. Layihə Almaniyanın KfW inkişaf bankının 450 min avro məbləğində qrantı hesabına həyata keçirilir. Bu barədə çərşənbə axşamı bankın Bakı nümayəndəliyinin rəhbəri Natiq Abdullayev deyib.
"Layihə Gəncə və Şəki şəhərlərində kadastr və daşınmaz əmlakın qeydiyyatı sisteminin inkişafı, daşınmaz əmlakın qeydiyyatı sahəsində xidmət səviyyəsinin, eləcə də bu sahədə operativliyin artırılmasını nəzərdə tutur", - Abdullayev qeyd edib.
KfW layihənin həyata keçirilməsinə 2,5 milyon avro məbləğində güzəştli kredit və benefisiarın yaradılması üçün bir milyon avro qrant ayırıb. Lakin Abdullayev maliyyələşdirmənin həcminin artırılmasını istisna etməyib. Bu, qiymətləndirmə başa çatandan sonra müəyyən ediləcək.
Layihə iki mərhələdə həyata keçiriləcək. Birinci mərhələ məsləhətçi xidmətlərin göstərilməsindən ibarətdir və layihənin bu komponenti üzrə tenderin qalibi GFA/GCI Consortium şirkəti olub. Şirkət artıq iş planını Dövlət Daşınmaz Əmlak Komitəsinə təqdim edib və yanvarda fəaliyyətə başlayıb.
Layihə 30 ay ərzində reallaşdırılacaq. Layihənin həyata keçirilməsi nəticəsində daşınmaz əmlakın qeydiyyat prosedurları təkmilləşdiriləcək, vaxta qənaət təmin olunacaq, eləcə də daşınmaz əmlakın qeydiyyatına xərclər azaldılacaq.
Layihənin həyata keçirilməsi torpaq sahələrinin və daşınmaz əmlakın idarə edilməsi üçün əlverişli mexanizmin formalaşması, eləcə də rəqəmsal kadastr xəritələrinin yaradılması üçün də şərait yaradacaq.