Azərbaycan, Bakı, 10 avqust /Trend, müxbir N.İsmayılova/
İyulun 1-nə olan məlumata görə, Azərbaycan banklarının qiymətli kağızlara investisiyaları 1,1 milyard manat təşkil edib. Bu barədə AMB-nin maliyyə sabitliyi üzrə hesabatında deyilir.
Bütün qiymətli kağızların bankların ortaillik aktivlərinin həcmində xüsusi çəkisi 8,4 faiz təşkil edib. Ötən ilin analoji dövründə bu göstərici 0,3 milyard manat və 6,8 faiz təşkil edib.
Hesabatda deyildiyinə görə, ilin ilk yarısında qiymətli kağızların portfel strukturunda da dəyişiklik müşahidə olunub. Belə ki, 2010-cu il iyulun 1-nə dövlət qiymətli kağızlarının qiymətli kağızların ümumi prtfelində payı 23 faiz (192,1 milyon manat) təşkil edirdisə, 2011-ci ilin iyulun 1-nə bu göstərici 31 faiz olub (353,2 milyon manat). Bu, dövlət qiymətli kağızların gəlirlərinin artması ilə izah olunur.
Bankların korporativ qiymətli kağızlara qoyuluşları il ərzində 25,7 faiz artıb və ilin birinci yarısının yekunlarına görə 782,6 milyon manat təşkil edib. Korporativ qiymətli kağızların mütləq mənada artmasına baxmayaraq, onların xüsusi çəkisi il ərzində 5,9 faiz azalıb və portfelin ümumi həcminin 68,7 faizini təşkil edib.
Avqustun 10-na olan rəsmi məzənnə 0,7865 AZN/USD təşkil edir.
