Azərbaycan, Bakı, 17 avqust /Trend, müxbir N.İsmayılova/
İlin əvvəlindən İqtisadi İnkişaf Nazirliyinin Sahibkarlığa Kömək Milli Fondu (SKMF) əvvəllər verilən iri və böyük kreditlərin xərclənməsinin monitorinqini aparıb. Bu barədə çərşənbə günü fondun icraçı direktoru Şirzad Abdullayev deyib.
"Fond mütəmadi olaraq verilən kreditlərin monitorinqini aparır. Böyük və iri layihələr ayda iki dəfə fondun əməkdaşları tərəfindən yoxlanılır və sahibkarlarla layihələrin həyata keçirilməsinin dinamikası və mövcud problemlər müzakirə edilir. Bundan başqa, fond kiçik layihələrin də monitorinqini aparır", - Abdullayev bildirib.
Onun sözlərinə görə, nəticədə aşkar edilib ki, vəsaitlər əsasən təyinatı üzrə xərclənir.
"2008 və 2009-cu illərdə dövlət büdcəsinə təyinatı üzrə xərclənməyən 12 milyon manatın qaytarılması təmin edilmişdisə, indi belə pozuntular müşahidə edilmir. Sahibkarlar daha məsuliyyətli və maraqlı olublar", - Abdullayev qeyd edib.
2011-ci ildə SKMF 92,1 milyon manat məbləğdə cəmi 1102 kredit verib. Bu vəsaitlər dəyəri 77,4 milyon manat olan 57 iri və 14,7 milyon manat məbləğdə 1045 kiçik layihənin həyata keçirilməsinə yönəldilib.
Avqustun 17-nə olan rəsmi məzənnə 0,7865 AZN/USD təşkil edir.