Azərbaycan, Bakı, 22 avqust /Trend, müxbir N.ismayılova/
Dünya Bankı cari ilin payızında bankın Direktorlar Şurasına "Məcburi köçkünlərin iqtisadi inkişafına yardım" layihəsini təqdim etməyi planlaşdırır. Trend-in məlumatınba görə, bu barədə bazar ertəsi DB-nin Bakı nümayəndəliyindən məlumat verilib.
Nümayəndəlikdən dediklərinə görə, sentyabrda ölkəyə layihənin hazırlanmasına yekun vurmaq məqsədilə DB missiyasının səfəri gözlənilir.
"Buna görə də missiya başa çatdıqdan sonra layihənin tamamlanacağı və payızın sonuna Direktorlar Şurasına təqdim ediləcəyi mümkündür", - bankdan bildiriblər.
"Məcburi köçkünlərin iqtisadi inkişafına yardım" layihəsi üçün yeni kredit 50 milyon dollar təşkil edir. Bu layihənin ümumi dəyəri 74,5 milyon dollar qiymətləndirilir. Azərbaycan hökuməti layihənin dəyərinin 25 faizini və vergilərin ödənilməsi üzrə xərcləri maliyyələşdirəcək.
Layihənin birinci mərhələsinin dəyəri 12,6 milyon dollar təşkil edir. Bunun 11,5 milyon dolları DB-nin kreditinin hesabına ayrılıb. Təcrübəyə zidd olaraq, layihə üzrə vəsait bir il tez mənimsənilib, lakin inflyasiya prosesləri ilə əlaqədar nəzərdə tutulan 200 infrastruktur mikrolayihə başa çatdırılmayıb. Bu səbəbdən əlavə vəsaitlər tələb olunub. Layihənin başa çatdırılması üçün cəmi 24,19 milyon dollar ayrılıb. Bundan 9,6 milyon SDR (15 milyon dollar) DB-nin, 8,69 milyon dollar (3,69 milyon dollar məbləğində ƏDV nəzərə alınmaqla) ölkə hökumətinin payına düşür.
Layihə çərçivəsində 108 min məcburi köçkün mənfəət əldə edəcək.
Dünya Bankının Azərbaycandakı indiki portfeli ümumi dəyəri 2,3 milyard dollar olan 20 layihədən ibarətdir. Azərbaycan 1992-ci ildən DB ilə əməkdaşlıq edir və əməkdaşlıq çərçivəsində bank hazırda 43 layihənin maliyyələşdirilməsinə 2,9 milyard dollar ayırıb, bu isə Türkiyə və Qazaxıstandan sonra ölkəni portfelin həcminə görə üçüncü yerə qoyur.
