Azərbaycan, Bakı, 13 sentyabr /Trend, müxbir N.İsmayılov/
Asiya İnkişaf Bankı Azərbaycanda su təchizatı və kanalizasiya sisteminin təkmilləşdirilməsi üçün multitranş maliyyələşdirmədən (MFF) ikinci tranşın həcmini artırıb. Bu barədə Trend-ə çərşənbə axşamı bankın Bakı nümayəndəliyindən bildirilib.
"Əvvəlcə ikinci tranşın həcmi 180 milyon dollar səviyyəsində nəzərdə tutulmuşdusa, indi onun 300 milyon dollaradək artırılması barədə qərar qəbul edilib", - nümayəndəlikdən deyilib.
Məlumata görə, bu qərar bankda azad vəsaitin əmələ gəlməsinə görə qəbul edilib.
Nümayəndəlikdən bildiriblər ki, bu gün əsas məsələ Ağdaş, Göyçay və Naxçıvanda su təchizatı və kanalizasiya sisteminin yaxşılaşdırılması işlərinin tamamlanmasıdır. İkinci tranşdan qalan vəsait hesabına isə digər rayonları da əhatə etmək olar.
Layihəyə Ağcabədi, Beyləqan və Balakən rayonlarından birinin daxil edilməsi gözlənilir. Digər rayonlardakı işlər isə layihə çərçivəsində başqa tranşlar vasitəsilə maliyyələşdiriləcək.
Bankın Direktorlar Şurası ikinci tranşın 300 milyon dollar həcmində olmasını dekabrın 2-də müzakirə etməyi planlaşdırır. 175 milyon dollarlıq üçüncü tranşın müzakirəsi isə 31 dekabr 2012-ci ildə olacaq.
Bu gün AİB su təchizatı və sanitar xidmətlər sisteminin yaxşılaşdırılması üzrə iki layihəni maliyyələşdirir. 30 milyon dollar məbləğində birinci kredit 2004-cü ildə Göycay və Naxçıvanda su təchizatı sisteminin bərpasına ayrılıb. Onun həyata keçirilmə müddəti 30 iyun 2011-ci ildə başa çatır.
Beş il əvvəl təsdiqlənmiş layihənin bahalaşması və həmin rayonlarda işləri tam əhatə etməsi ilə əlaqədar MFF vəsaitləri hesabına 75 milyon dollar (birinci tranş), Azərbaycan hökuməti isə 25 milyon dollar ayırıb.
İkinci tranş bu layihənin əhatə dairəsinin genişləndirilməsinə və dörd şəhəri - Ağdaş, Ağcabədi, Beyləqan və Balakəni əhatə etmək üçün nəzərdə tutulub.
MFF 2009-cu ilin sentyabrında bankın Direktorlar Şurasında 600 milyon dollar həcmi ilə bəyənilib. Multitranş maliyyələşdirmə su təchizatı və kanalizasiya sahəsində islahatlar proqramı və aydın strategiya ilə dəstəklənən investisiyaları nəzərə alaraq AİB ilə ölkə hökuməti arasında səkkizillik əməkdaşlıq üçün əsas olacaq.
"Azərsu" ASC-nin su layihəsi üzrə məsləhətçisi "AICO Consulting Ltd/European Consultans Organization" konsorsiumudur.