Azərbaycan, Bakı, 13 sentyabr /Trend, müxbir N.İsmayılova/
Texnika Bankın tam mülkiyyətində olan TexKart prosessinq mərkəzi bir ay müddətində mal və xidmətlərin internet vasitəsilə ödənilməsi üçün elektron ticarət (e-commerce) xidmətini işə salmağı planlaşdırır. Bu barədə çərşənbə axşamı Trend-ə bankın rəyasət heyətinin sədri Samir Hüseynov bildirib.
"Gözlədiyimizə görə, beynəlxalq ödəniş sistemi Visa Inc tərəfindən prosessinq mərkəzinin sertifikatlaşdırılması bir aydan sonra tamamlanacaq, bundan bir qədər sonra isə MasterCard-da sertifikasiya prosesi başa çatacaq", - Hüseynov deyib.
Elektron ticarət - bütün dünyada yayılmış mal alqı-satqısı və xidmət ödənişlərini internetdə plastik kart vasitəsilə həyata keçirməyə imkan verir.
"Texnikabank" bank bazarında 1993-cü ildən fəaliyyət göstərir və 2007-ci ilədək 100 faiz Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.
TexKart 2007-ci ildən bir milyon manat nizamnamə kapitalı ilə fəaliyyət göstərir. Hazırda Texnika Bank kartlarına xidmət göstərilir, lakin gələcəkdə başqa banklara da xidmət göstərilməsi nəzərdə tutulub.
Sentyabrın 13-nə olan rəsmi məzənnə 0,7866 AZN/USD təşkil edir.
