Azərbaycan, Bakı, 22 sentyabr /Trend, müxbir A.Axundov/
Azərbaycan çox ehtiyatlı tarif siyasəti yürüdür. Trend-in məlumatına görə, bu barədə ERRA-nın (Enerji Tənzimləyicilərinin Regional Assosiasiyası) sədri Qabor Soreni cümə axşamı Bakıda jurnalistlərə deyib.
"Tarif siyasətini həyata keçirərkən Azərbaycan həm qısamüddətli, həm də uzunmüddətli məqsədləri nəzərə alır", - Soreni bildirib.
Onun sözlərinə görə, enerjidaşıyıcıların tarifləri bir tərəfdən son istifadəçilər üçün rahat olmalı, digər tərəfdən enerji məhsullarını satan şirkətlər üçün sərfəli olmalıdır.
"Azərbaycanda enerjidaşıyıcıların, o cümlədən benzinin pərakəndə qiymətləri aşağıdır. Bakıda avtomobillərin sayının çox olması səbəbindən yanacağa böyük tələbat var və insanlar benzin almaq iqtidarındadırlar", - o deyib.
Sentyabrın 22-23-də Bakıda ERRA-nın (Enerji Tənzimləyicilərinin Regional Assosiasiyasının) sədrlər yığıncağı və Qiymətəmələgəlmə və Tariflər üzrə komitəsinin iclası keçirilir.
Azərbaycan Respublikası Tarif (qiymət) Şurasının da üzv olduğu ERRA Mərkəzi Avropa, Avrasiya və ABŞ-ın tənzimləyici qurumlarının birliyi kimi 2001-ci ildə yaradılıb.
Təşkilatın vəzifələri üzv ölkələrin tənzimləyici qurumlarının dəstəklənməsi, informasiya və təcrübə mübadiləsinin asanlaşdırılması, elmi tədqiqat və praktiki bilik səviyyəsinin artırılması, o cümlədən tədris-təhsil və texniki sahələrdə əməkdaşlığın təşviqidir.