Azərbaycan, Bakı, 27 sentyabr /Trend, müxbir N.İsmayılova/
Azərbaycan Əmanətlərin Sığortalanması Fondu (ADIF) öz aktivlərini yerləşdirərkən üstünlüyü milli valyutaya verəcək. Trend-in məlumatına görə, bunu çərşənbə axşamı jurnalistlərə Fondun icraçı direktoru Azad Cavadov deyib.
"Hazırda Fondun məcmu aktivləri 37 milyon manat təşkil edir və ilin son rübündə ADIF üzvü olan bankların təqvim ödənişləri qismində əlavə 2,5 milyon manatın qəbulu gözlənilir", - o deyib.
Hazırda Fondun vəsaitlərindən 19 milyon manat dövlət qiymətli kağızlarında yerləşdirilib.
Bundan əvvəl "Deutsche bank"ın törəmə şirkəti olan "Deutsche Invest" şirkətinə ADIF-in kapitallaşması üçün 5 milyon avro və öz şəxsi vəsaitindən 10,7 milyon dollar pul qoyuluşu edən KfW-nin vəsaitinin idarəsi həvalə olunmuşdu. Fondun investisiya siyasətinə əsasən, onun vəsaiti ancaq xarici bankların yüksəkreytinqli qiymətli kağızlarında və AAA reytinqli maliyyə müəssisələrində yerləşdirilə bilər.
"Biz öz vəsaitlərimizi manatda yerləşdirməyə davam edəcəyik, çünki əmanətlərin ümumi həcminin 48 faizi manatda, 43 faizi dollarda, təxminən 8-9 faizi avroda yerləşdirilib", - Cavadov bildirib.
Onun sözlərinə görə, növbəti təqvim ödənişləri manatda yerləşdiriləcək.
"Aktivlərin böyük hissəsinin manatda yerləşdirilməsi onunla izah olunur ki, qaydalara əsasən, əgər əmanət bir neçə valyutada yerləşdirilibsə, onda zərərlərin qarşılığı manatla, əgər bir valyuta ilə - dollar və ya avroda yerləşdirilibsə, onda Fonda müvafiq valyuta ilə ödənilməlidir", - o deyib.
ADIF 2007-ci il avqustun 13-də fəaliyyətə başlayıb.
Hazırda ölkədə fəaliyyət göstərən 44 bankdan 43-ü Fondun üzvüdür. Bir bank isə Mərkəzi Bankın tələblərinə cavab verə bilmədiyi üçün məhdud lisenziya ilə fəaliyyət göstərir və əmanətlərin qəbulunu apara bilmir.
ADIF-in fəaliyyəti ərzində Azərbaycanda heç bir bankın müflisləşməsi qeydə alınmadığı üçün Fond heç bir ödəniş həyata keçirməyib.