Azərbaycan, Bakı, 4 noyabr / Trend, müxbir N.İsmayılova/
Avropa Yenidənqurma və İnkişaf Bankının (AYİB) Direktorlar Şurası bir ay ərzində Azərbaycan üçün iri nəqliyyat layihəsinin reallaşdırılması məsələsinə baxacaq. Bu barədə AYİB-in Bakı ofisinin rəhbəri Neyl Makkeyn (Neil Mckain) cümə axşamı jurnalistlərə bildirib.
"Direktorlar Şurasında görüşün keçirilməsi ay ərzində nəzərdə tutulub. Görüşdə yol layihəsinin reallaşdırılması məsələsinə baxılacaq. Hərçənd ki, yol infrastrukturunun maliyyələşdirilməsi üzrə məhz hansı variantın bəyəniləcəyi hələ məlum deyil", - o deyib.
Makkeynin sözlərinə görə, maliyyələşdirmənin ümumi məbləği 750 milyon dollar təşkil edir.
"Biz Azərbaycan hökuməti ilə bu məbləğin verilməsini müzakirə edirik. Ola bilsin ki, o, üç tranşda ayrılacaq", - o bildirib.
2009-cu ildə AYİB Azərbaycanda üm umi məbləği 232 milyon dollar həcmdə doqquz layihəyə sərmayə qoyub. 2010-cu ildə AYİB 79 milyon dollarlıq 13 layihəni maliyyələşdirib. 2011-ci ildə bank 14 layihənin həyata keçirilməsinə 90 milyon dolalr vəsaitin ayrılmasının planlaşdırır.
Bank vəsaitlərindən Mərkəzi Avropa və Mərkəzi Asiyanın 30 ölkəsində demokratiyanın və bazar iqtisadiyyatının qurulması məqsədilə istifadə olunan maliyyə institutudur. 61 ölkə və iki beynəlxalq təşkilat onun sahibidir.