Azərbaycan, Bakı, 8 noyabr /Trend, müxbir N.İsmayılova/
2011-ci ilin üç rübü ərzində Azərbaycanda fəaliyyət göstərən bank olmayan kredit təşkilatlarının (BOKT) sayı 10 ədəd artaraq 111-ə çatıb. Trend-in məlumatına görə, bu barədə Mərkəzi Bankın (AMB) saytında dərc olunmuş bankın statistik hesabatında deyilir.
Kredit ittifaqlarının sayı ilin əvvəlindən 4 ədəd artaraq 86-ya çatıb. Xarici humanitar təşkilatların hesabına maliyyələşdirilən kredit təşkilatlarının sayı 24 ədəd olub və ilin əvvəlindən altı təşkilata lisenziya verilib. Bu gün ölkədə həmin təşkilatların 73 filialı fəaliyyət göstərir.
AMB-nin məlumatına görə, üçüncü rübün yekunları üzrə ölkədə fəaliyyət göstərən BOKT-ların nizamnamə kapitalı 42,18 milyon manat, aktivləri 300,08 milyon manat, filiallarının sayı isə 85-ə çatıb.
Kredit ittifaqlarının nizamnamə kapitalının ümumi həcmi 11,24 milyon manat, ümumi aktivləri 37,71 milyon manat təşkil edib. Xarici humanitar təşkilatların hesabına maliyyələşdirilən kredit təşkilatlarının ümumi kapitalı12,41 milyon manat, aktivləri isə 236,18 milyon manat olub.
