Azərbaycan, Bakı, 15 noyabr /Trend, müxbir N.İsmayılova/
CAREC Katiblyinin nümayəndələri tərkibində nümayəndə heyəti "CAREC 2020"-nin nazirlər səviyyəsində konfransına hazırlıq məqsədilə noyabrın 18-də Bakıya gələcək. Bu barədə çərşənbə axşamı Trend-ə Asiya İnkişaf Bankının (AİB) Bakı nümayəndəliyindən deyiblər. İclas noyabrın sonunda Bakıda baş tutacaq.
"CAREC Katibliyinin nümayəndələri Bakıya konfransa hazırlıq məqsədilə gələcəklər", - nümayəndəlikdən deyiblər.
Əvvəl verilən məlumata əsasən, AİB prezidenti Haruhiko Kuroda noyabrın 23-25-də "CAREC 2020"-nin nazirlər səviyyəsində konfransında iştirak etmək üçün Azərbaycana səfər edəcək.
İclasda CAREC-in son onillikdə fəaliyyətinə qiymət veriləcək və növbəti on il üçün yeni strategiya təqdim ediləcək.
Əsası 1997-ci ildə qoyulan CAREC proqramının 10 üzvü var: Əfqanıstan, Azərbaycan, Çin Xalq Respublikası, Qazaxıstan, Qırğızıstan, Monqolustan, Pakistan, Tacikistan, Türkmənistan və Özbəkistan. CAREC-in həmçinin 6 beynəlxalq tərəfdaşı var: Asiya İnkişaf Bankı (AİB), Avropa Yenidənqurma və İnkişaf Bankı (AYİB), Beynəlxalq Valyuta Fondu (BFV), İslam İnkişaf Bankı (İİB), Birləşmiş Millətlər Təşkilatının İnkişaf Proqramı (UNDP) və Dünya Bankı.
Kurodanın Azərbaycana sonuncu səfəri 2008-ci ilin noyabrında baş tutub. AİB 2001-ci ildən CAREC-in Katibliyidir.