Azərbaycan, Bakı, 23 noyabr /Trend, müxbir E.İsmayılov/
Azərbaycanın "Ata Texnologiya" və Sloveniyanın "Adacta" şirkətləri 3-5 ay ərzində Azərbaycan şəraitinə uyğunlaşdırılmış sığorta sektoru üçün yeni proqram təminatı sisteminin hazırlanması üzrə yekun təklif təqdim etməyi planlaşdırırlar. Trend-in məlumatına görə, bu barədə çərşənbə günü jurnalistlərə "Ata Texnologiya" MMC-nin direktoru Mais Yusifov deyib.
Çərşənbə günü Bakıda "Ata Texnologiya" və "Adacta" informasiya texnologiyaları sahəsində birgə əməkdaşlıq haqqında müqavilə imzalayıblar. Müqavilədə ilkin mərhələdə sığorta sahəsində biznes proseslərinin avtomatlaşdırılması üzrə xüsusi proqram təminatının birgə işlənib hazırlanması və tətbiqi nəzərdə tutulur.
"Adacta" şirkəti iki il ərzində Azərbaycanın sığorta bazarını təhlil edib və demək olar ki, bütün sığorta şirkətləri yeni proqram haqqında məlumatlandırılıb.
"Proqram təminatı tam hazırlandıqdan və Azərbaycan şəraitinə uyğunlaşdırıldıqdan sonra tərəflər onun yekun variantını şirkətlərə təqdim etmək niyyətindədir", - Yusifov bildirib.
Onun sözlərinə görə, Azərbaycanda fəaliyyət göstərən 28 sığorta şirkətindən ancaq 2-3 strukturun müasir proqram təminatı var.
"Azərbaycanda "İcbarı sığorta haqqında" qanunun tətbiqi və sığorta əməliyyatlarının həcminin artması ilə qalan şirkətlər bu proqram təminatına ehtiyac duyacaqlar", - o deyib.
"İcbarı sığorta haqqında" qanun 2011-ci ildə qüvvəyə minib və onun tətbiq edilməsinə başlamaq üçün normativ aktlar hazırlanır.
Yusifovun sözlərinə görə, hazırda 5-6 sığorta şirkəti ilə danışıqlar aparılır və proqram təminatının hazırlanması prosesinin başa çatmasından sonra onlara yekun təklif təqdim ediləcək.
"Tərəfdaşlar, həmçinin, Azərbaycan hüdudlarından kənara çıxmaq niyyətindədirlər və potensial bazar qismində Gürcüstan, Mərkəzi Asiya və Rusiya bazarları nəzərdən keçirilir", - o vurğulayıb.
"Adacta"nın baş meneceri Tomas Volkun sözlərinə görə, şirkətin illik gəliri 14 milyon avro təşkil edir və bu, kompüterlərin və İT texnologiyaların satışından əldə edilməyib. Gəlirlər proqram təminatı sahəsində göstərilən xidmətlərdən qazanılıb.
