...

Azərbaycan Maliyyə Nazirliyi Prezidentin sonuncu sərəncamları üzrə maliyyə yükünü açıqlayıb

Biznes və iqtisadiyyat xəbərləri Materials 6 Dekabr 2011 17:17 (UTC +04:00)

Azərbaycan, Bakı, 6 dekabr /Trend, müxbir A.Axundov/

Milli Məclisdə 2012-ci il dövlət büdcəsi layihəsinə baxılması zamanı ölkə Prezidenti və hökuməti tərəfindən bir sıra qərarlar qəbul edilib ki, onların yerinə yetirilməsi üçün 20 milyon manat vəsait tələb olunur. Trend-in məlumatına görə, bu barədə çərşənbə axşamı maliyyə naziri Samir Şərifov 2012-ci il və sonrakı üç il üzrə dövlət büdcəsi layihəsinin müzakirəsində bildirib.

"2012-ci il dövlət büdcəsi layihəsinin parlamentə təqdim olunmasından keçən dövr ərzində indiyə kimi Prezident tərəfindən birbaşa dövlət büdcəsi ilə əlaqəsi olan bir sıra sərəncamlar verilib, habelə hökumət, o cümlədən Tarif Şurası tərəfindən qərarlar qəbul edilib. Bir sıra icra hakimiyyəti orqanları birləşdirilib, bəzi elmi-tədqiqat institutlarının tabeçilik qaydaları dəyişdirilib, minimum əməkhaqqının səviyyəsi artırılıb, bəzi büdcə təşkilatları işçilərinin əməkhaqları, kommunal xidmət xərcləri üzrə tariflər (isitmə, bərk məişət tullantılarının daşınması) artırılıb. Bütün bu qərarların yerinə yetirilməsi üçün 20 milyon manat məbləğində əlavə xərc tələb olunur", - Şərifov deyib.

Həmin vəsaitlərin ayrılması çərşənbə axşamı parlamentdə təsdiqlənən büdcədə nəzərdə tutulub.

Azərbaycan Prezidenti İlham Əliyev bazar ertəsi təhsil müəssisələrində çalışan işçilərin əməkhaqlarının artırılması haqqında sərəncam imzalayıb.

Sərəncamda qeyd olunur ki, dövlət büdcəsindən maliyyələşdirilən təhsil müəssisələrində (ali təhsil müəssisələri istisna olmaqla) çalışan işçilərin Vahid Tarif Cədvəli ilə müəyyən edilmiş aylıq vəzifə (tarif) maaşları 2011-ci il dekabrın 1-dən orta hesabla 10 faiz artırılsın.

Prezidentin ötən həftənin sonlarında imzaladığı sərəncama görə, Azərbaycanda əməkhaqqının minimum məbləği on faiz artırılaraq 93,5 manat səviyyəsinə çatdırılıb.

Dekabrın 6-na olan rəsmi məzənnə 0,7865 AZN/USD təşkil edir.

Xəbər lenti

Xəbər lenti