Azərbaycan, Bakı, 7 dekabr /Trend müxbir A. Axundov/
Azərbaycan Mərkəzi Bankının (AMB) məzənnə siyasəti ölkədəki ümumi makroiqtisadi vəziyyətdən asılıdır və AMB-nin əsas vəzifəsi milli valyutanın real məzənnəsinin möhkəmlənməsinə yol verməməkdir. Trend-in məlumatına görə, bu barədə çərşənbə günü jurnalistlərə AMB-nin idarə heyətinin sədri Elman Rüstəmov deyib.
"Əgər manatın real məzənnəsi möhkəmlənirsə, qeyri-neft sektorunun ixracatçılarının ticarət şətləri ağırlaşır. Məzənnənin sabit qalması halında da şərtlər sabit qalır. Əgər məzənnə ucuzlaşardısa və inflyasiya aşağı düşərdisə, o zaman bizim ticarət tərəfdaşlarımız əlavə rəqabət üstünlükləri ala bilərdilər", - Rüstəmov bildirib.
Onun sözlərinə görə, bu, təkcə 2012-ci ilin vəzifəsi deyil, həmçinin qlobal tapşırıqdır. "Buna görə də məzənnə siyasəti iqtisadiyyatın diversifikasiyasının, ölkənin ixracat potensialının artırılması komponentlərindən biridir və bizim əsas vəzifəmiz manatın real məzənnəsinin möhkəmlənməsinə yol verməməkdir", - AMB rəhbəri qeyd edib.
Hökumətin proqnozlarına əsasən, milli valyutanın ABŞ dollarına qarşı orta illik məzənnəsi 2011-ci ildə olduğu kimi, 2015-ci ilə qədər dəyişməz olaraq 0,79 manat səviyyəsində qalacaq.
Ölkə hökuməti dollara qarşı məzənnə proqnozunu sabit saxlayır, avroya qarşı isə manatın məzənnəsinin tədricən möhkəmlənməsini proqnozlaşdırır: 2012-ci ildə 0,26 faiz, 2013-cü ildə 2,77 faiz, 2014-cü ildə 1,68 faiz və 2015-ci ildə 0,41 faiz.
Milli valyutanın dollara qarşı məzənnəsi ötən ilin sentyabrından yavaş templərlə möhkəmlənir. İl ərzində manatın ABŞ valyutasına qarşı məzənnəsi 1,64 faiz möhkəmlənib və dekabrın 7-nə olan vəziyyətə görə, 0,7864 AZN/USD təşkil edir. 2011-ci ildə dollar 1,4 faiz ucuzlaşıb.
Manatın avroya qarşı məzənnəsinin möhkəmlənməsi ötən ilin yanvarından başlayıb.
İl ərzində milli valyutanın Avropa valyutasına qarşı məzənnəsi 1,03 faiz, 2011-ci il ərzində isə 0,3 faiz artıb.
