Azərbaycan, Bakı, 26 dekabr /Trend, müxbir E.İsmayılov/
Gələn ilin yanvar-fevralında "Baku Taxi Company" London Taxi TX4 markalı avtomobillərin alınması üzrə yeni müqavilənin bağlanması üçün danışıqlara başlayacaq. Bu barədə bazar ertəsi Trend-ə şirkətin rəhbəri İlqar Qasımov deyib.
"Yaxın günlərdə Bakıya London Taxi TX4 avtomobillərinin 500 ədədindən ibarət son partiya çatdırılacaq", - Qaasımov bildirib.
Hazırda Bakı küçələrində 500 belə avtomobil işləyir.
"Yeni avtomobillər artıq ilin sonunda və ya gələn il yanvarın əvvəlində gələcək. Hər iki tərəfin müqavilə öhdəliklərini yerinə yetirməsindən sonra yeni müqavilənin bağlanması üçün danışıqlar başlayacaq", - o vurğulayıb.
Birinci müqavilə çərçivəsində bu markadan 1000 ədəd avtomobilin gətirilməsi nəzərdə tutulur. Qasımov deyib ki, danışıqların yekunu üzrə yeni müqavilə çərçivəsində gətiriləcək avtomobillərin sayı müəyyənləşdiriləcək.
Onun sözlərinə görə, bununla yanaşı, Bakıda sərnişindaşıma üçün lisenziya alacaq taksilərin sayı 3500-4000 ədəd təşkil edəcək və şirkət onlardan çoxunun London Taxi TX4 markalı avtomobillər olmasına çalışacaq.
"Paytaxt sərnişinləri üçün xidmətlər göstərəcək avtomobillər rahat, təhlükəsiz olmalı və taksometr əsasında işləməlidir. Bütün bu tələblərə London Taxi TX4 avtomobilləri cavab verir", - Qasımov söyləyib.
Onun sözlərinə görə, şirkət bu avtomobilləri kifayət qədər yaxşı şərtlərlə istənilən kəsə, o cümlədən də şirkətlərə və ayrı-ayrı fiziki şəxslərə təqdim etməyə hazırdır.
"Baku Taxi Company" gediş tariflərinin dəyişdirilməsi imkanını da nəzərdən keçirir. "Hələlik bu məsələ baxılma mərhələsindədir", - Qasımov bildirib.
Azərbaycan Nəqliyyat Nazirliyinin elan etdiyi "Bakıda taksi parkının London Taxi TX4 markalı avtomaşınlara dəyişdirilməsi" proqramı çərçivəsində yeni "Baku Taxi Company" şirkəti yaradılıb.
"Manganese Bronze Holdings PLC" və Çinin avtomobil istehsalçısı "Geely Automobile Holdings Limited"in birgə müəssisəsi olan "Shanghai LTI" şirkətinin bu taksilərinin 2011-ci ildə Bakıya tədarükü üzrə saziş London şirkəti üçün ən iri müqavilədir. Sifarişin ümumi dəyəri 27 milyon dollara yaxındır.
Hazırda "Baku Taxi Company"nin avtomobillərində gedişhaqqı aşağıdakı kimidir:
|
Çatdırma qiyməti |
1 manat |
|
Hər kilometrə görə gedişhaqqı (10 kilometrə qədər) |
0,7 manat |
|
Hər kilometrə görə gedişhaqqı (10 kilometrdən 20 kilometrə qədər) |
0,4 manat |
|
Hər kilometrə görə gedişhaqqı (20 kilometrdən və daha artıq kilometr) |
0,2 manat |
|
Dayanmanın hər dəqiqəsinin qiyməti |
0,05 manat |
Dekabrın 26-na olan rəsmi məzənnə 0,7863 AZN/USD təşkil edir.