Azərbaycan, Bakı, 29 dekabr /Trend, müxbir N.İsmayılova/
Azərbaycan Mərkəzi Bankı (AMB) "brend" bankların ölkənin bank bazarına daxil olmasında maraqlıdır. Bu barədə Trend-ə cümə axşamı AMB-dən məlumat veriblər.
"Azərbaycanın bank sektorunda xarici kapitalın iştirakı üçün məhdudiyyət yoxdur. AMB "brend" bankların ölkənin bank sisteminə daxil olmasında maraqlıdır və xarici bankların yerli bazara çıxışını həmişə dəstəkləyib", - bankdan bildiriblər.
Məlumata əsasən, bu gün Azərbaycanda xarici kapital 22 bankda mövcuddur. Bundan başqa, ölkədə "Commerzbank", "Citi bank" və "Societe Generale" kimi bankların nümayəndəlikləri fəaliyyət göstərir.
"Gələcəkdə bu nümayəndəliklərin törəmə bank strukturları qismində formalaşması mümkündür. Ümumilikdə, sektorda bankların xarici kapitalla iştirakı rəqabət qabiliyyətinin artmasına, yeni texnologiyaların tətbiqinə, korporativ idarəetmə standartlarının tətbiqinin yaxşılaşdırılmasına kömək edir. Bu da nəticədə göstərilən xidmətin keyfiyyətinin yaxşılaşmasına və etibarlı bank məhsullarının təqdim edilməsinə gətirib çıxarır", - AMB-dən deyiblər.
