Azərbaycan, Bakı, 5 yanvar /Trend müxbir N.İsmayılova/
Dekabrın 1-nə olan məlumata əsasən, Azərbaycanda 4,535 milyon ədəd ödəniş kartı var. Bu da noyabr ərzində 1,4 faiz, 2010-cu ilin analoji dövrünün göstəricisi ilə müqayisədə 7,7 faiz artım deməkdir. Bu barədə cümə axşamı Azərbaycan Mərkəzi Bankının (AMB) statistik hesabatında məlumat verilir.
Bankomat və POS-terminallar vasitəsilə ödəniş kartları üzrə ümumi dövriyyə 609 milyon manat, əməliyyatların ümumi sayı 4,071 milyon ədəd təşkil edib.
Debet kartlar üzrə əməliyyatların ümumi sayı 3,811 ədəd, həcmi isə 543 milyon manat təşkil edib.
Debet kartlar üzrə əməliyyatların ümumi sayından bankomatlar vasitəsilə 512 milyon manat məbləğində 3,541 min, POS-terminallar vasitəsilə 17 milyon manat məbləğində 152 min əməliyyat yerinə yetirilib.
Ötən ilin noyabrında kredit kartları vasitəsilə ümumi həcmi 66 milyon manat olan 260 min əməliyyat yerinə yetirilib.
Kredit kartları vasitəsilə əməliyyatların ümumi sayından 27 milyon manatlıq 93 min əməliyyat bankomatlar, 15 milyon manatlıq 38 min əməliyyat isə POS-terminallar vasitəsilə həyata keçirilib.
Dekabrın 1-nə olan məlumata əsasən, ölkədə 2104 bankomat fəaliyyət göstərib, onlardan 1166 ədədi Bakıda, 938 ədədi isə ölkənin digər şəhər və rayonlarında yerləşir. Onların ümumi sayı 11 ay ərzində 225 ədəd və ya 12 faiz artıb.
Dekabrın 1-nə olan məlumata görə, POS-terminalların sayı 12778 ədəd təşkil edib ki, onlardan 11735 ədədi Bakıda, 1043 ədədi isə digər şəhər və rayonlarda yerləşir. Onların sayı ilin əvvəlindən 4866 ədəd (61,5 faiz) artıb.
Yanvarın 5-nə olan rəsmi məzənnə 0,7865 AZN/USD təşkil edir.
