Azərbaycan, Bakı, 12 yanvar /Trend, müxbir E.İsmayılov/
"Baku Taxi Company" şirkəti London Taxi TX4 markalı 1000 ədəd avtomobilin alınması üzrə yeni müqavilənin bağlanması imkanını nəzərdən keçirir. Bu barədə cümə axşamı Trend-ə şirkətin rəhbəri Eldar Qasımov deyib. Bir müddət əvvəl 1000 avtomobil tədarükü üzrə müqavilə bağlanmışdı.
Azərbaycan Nəqliyyat Nazirliyinin "Bakıda taksi parkının London Taxi TX4 markalı avtomaşınlara dəyişdirilməsi" proqramının inkişaf etdirilməsi üçün yeni özəl "Baku Taxi Company" şirkəti yaradılıb.
Qasımovun sözlərinə görə, istehsalçı artıq Azərbaycan üçün 1000 ədəd yeni avtomobilin istehsalı imkanı ilə bağlı öz təklifini təqdim edib.
"Hazırda bu təklif nəzərdən keçirilir və yeni avtomobillərin əldə edilməsi ilə bağlı müvafiq danışıqlar aparılır", - o bildirib.
Onun sözlərinə görə, həmçinin fevralın sonuna qədər Bakıya əvvəllər 1000 ədəd avtomobilin çatdırılması üzrə bağlanan müqavilə çərçivəsində London Taxi TX4 avtomobillərinin son partiyası gətirilməlidir.
"Yanvarın 30-da avtomobillərin son partiyası Şanxaydan göndərilməli və Bakıya 1 ay ərzində çatmalıdır", - Qasımov qeyd edib.
Onun sözlərinə görə, yeni avtomobillər Bakı küçələrində artıq qeydiyyat üzrə müvafiq prosedurdan keçdikdən sonra işləməyə başlaya bilərlər.
Hazırda Bakı küçələrində 500 belə avtomobil işləyir.
"Manganese Bronze Holdings PLC" və Çinin avtomobil istehsalçısı "Geely Automobile Holdings Limited"in birgə müəssisəsi olan "Shanghai LTI" şirkətinin bu taksilərinin 2011-ci ildə Bakıya tədarükü üzrə saziş London şirkəti üçün ən iri müqavilədir. Sifarişin ümumi dəyəri 27 milyon dollara yaxındır.