Azərbaycan, Bakı, 1 fevral /Trend, müxbir A.Axundov/
Azərbaycan Sığortaçılar Assosiasiyasının (ASA) üzvlük haqqının maksimum məbləği 16 min manat, minimum məbləği isə beş min manat məbləğində müəyyən edilib. Bu barədə ASA-nın hazırda Ədliyyə Nazirliyində qeydiyyatdan keçən nizamnaməsinin təsdiqlənmiş layihəsində deyilir.
ASA-nın icraçı direktoru Azər Əliyevin çərşənbə günü Trend-ə dediyi kimi, üzvlük haqları assosiasiyasının Müşahidə Şurasına üzvlükdən və şirkətin bazardakı payından asılı olacaq.
Hazırda üzvlük haqqının məbləği beş min manat təşkil edir.
"Assosiasiyasının Müşahidə Şurasının üzvləri üçün üzvlük haqqı 16 min manat, minimum məbləğ isə beş min manat səviyyəsində müəyyən edilib. Sığorta brokerləri, agentliklər, bu və ya digər dərəcədə sığorta fəaliyyəti ilə məşğul olan təşkilatlar üçün üç min manat həcmində üzvlük haqqı nəzərdə tutulub, lakin bizdə hələ belələri yoxdur", - Əliyev deyib.
ASA-nın nizamnaməsində əsas yenilik Müşahidə Şurasının tərkibinin genişlənməsidir.
"Əgər əvvəllər Müşahidə Şurasına beş şirkət daxil idisə, indi onların sayı yeddiyədək artıb. Bunlar AXA MBASK, Azərsığorta, Atəşgah, Standard Insurance, İpək Yolu Sığorta, AzRe və AzSığorta şirkətləridir. Beynəlxalq Sığorat Şirkəti Müşahidə Şurasının tərkibindən çıxıb, Paşa Sığorta isə iştirak etmək təklifindən imtina edib", - bir müddət əvvəl Əliyev bildirib.
Azərbaycanda 29 sığorta və bir təkrar sığorta şirkəti fəaliyyət göstərir. "Royal Sığorta"dan başqa, onların hamısı ASA-nın üzvləridir.
Fevralın 1-nə olan rəsmi məzənnə 0,7863 AZN/USD təşkil edir.