Azərbaycan, Bakı, 6 fevral /Trend, müxbir A.Axundov/
Bir çox Azərbaycan banklarında müasir tələblərə cavab verən proqram təminatı mövcud deyil. Bu barədə bazar ertəsi Trend-ə "AzərTürkBank"ın idarə heyətinin sədri Mehmet Sami Acarözmen deyib.
"Bank xidmətlərinin keyfiyyətini artırmaq üçün yaxşı proqram təminatına malik olmaq lazımdır. Kiçik kapitala malik banklar yaxşı proqram təminatı ala bilmirlər. Çünki onun qiyməti ən azı milyon dollardır", - Acarözmen qeyd edib.
Onun sözlərinə görə, Özbəkistan və Türkmənistanın mərkəzi bankları öz bankları qarşısında tələb qoymuşdular. Tələbə əsasən, banklar 2011-ci ilin sonuna qədər ən müasir proqram təminatı əldə etməli idilər, əks təqdirdə, onlar lisenziyadan məhrum ediləcəklər.
"Azərbaycanda da belə tələblərə zərurət var", - Acarözmen qeyd edib.
"AzərTürkBank"ın səhmlərinin 50 faizinə malik olan Türkiyənin dövlət bankı "Ziraat bank" Türkmənistan və Özbəkistanın bank bazarlarında da iştirak edir.
Azərbaycanda 44 bank fəaliyyət göstərir.
