Azərbaycan, Bakı, 28 mart /Trend, müxbir A.Axundov/
2011-ci ildə Azərbaycan iqtisadiyyatına cəlb edilən xarici kapitalın ümumi həcmi 2010-cu illə müqayisədə 2,4 faiz azalaraq 8,1 milyard dollar təşkil edib. Trend-in məlumatına görə, bu barədə çərşənbə günü Azərbaycan Mərkəzi Bankının (AMB) tədiyyə balansında deyilir.
Birbaşa investisiya şəklində ölkə iqtisadiyyatına qoyulan xarici kapitalın ümumi həcmi 4,4 milyard dollar təşkil edib. Burada neft-qaz sektorunun xüsusi çəkisi 78 faiz səviyyəsində olub. Bu investisiyalardan Azərbaycan ərazisində işlərin maliyyələşdirilməsi məqsədilə istifadə edilib. Bura, xüsusən "BP Exploration Ltd"nin neft-qaz layihələri ("Şahdəniz") və Azərbaycan Beynəlxalq Əməliyyat Şirkətinin "Azəri-Çıraq-Günəşli" yataqlar bloku çərçivəsində apardığı işlər aiddir.
AMB-nin qiymətləndirməsinə əsasən, qeyri-neft sektoruna cəlb edilən birbaşa investisiyaların həcmi 978,3 milyon dollar olub ki, bu da ölkəyə cəlb edilən birbaşa investisiyaların ümumi həcminin 22 faizini təşkil edib.
