Azərbaycan, Bakı, 4 aprel /Trend, müxbir Ə.Həsənov/
Avropa Yenidənqurma və İnkişaf Bankı (AYİB) ölkənin tikinti sektoru, sənaye və qida sahəsinin inkişafı üçün kreditlərin verilməsində maraqlıdır. Bu barədə çərşənbə günü Trend-ə AYİB-in Bakı ofisinin rəhbəri Neyl Makkeyn bildirib.
"Nəqliyyat sahəsinə gəlincə, biz ölkənin regional nəqliyyat infrastrukturunun inkişafına vəsait ayırırıq. Belə ki, ölkənin əsas infrastrukturu praktiki olaraq inkişaf edib", - Makkeyn deyib.
AYİB 2011-ci ildə iri nəqliyyat layihəsinin reallaşdırılmasına 750 milyon dollar verilməsi haqqında qərar qəbul edib. Layihə Gürcüstan və İranla birbaşa sərhəd olan əsas regional magistral yolların, dəhliz və ya yolların yenidən qurulmasını nəzərdə tuturdu.
Makkeynin sözlərinə görə, hazırda banklara kredit xətlərinin açılması üzrə danışıqlar da aparılır.
"Kredit vəsaitlərinin ayrılacağı Azərbaycan banklarının siyahısının genişləndirilməsi planlaşdırılır", - Makkeyn deyib. O, danışıqlar prosesinin davam etməsi səbəbindən bankların adlarını dəqiqləşdirməkdən imtina edib.
Onun sözlərinə görə, hazırda AYİB, həmçinin Azərbaycanın iki bankı - "Unibank" və "Muğanbank"a ipoteka kreditlərinin verilməsi istiqamətində işləyir. AYİB ölkənin 9 bankı, 6 mikromaliyyə təşkilatı və 3 bank olmayan kredit təşkilatı ilə əməkdaşlıq edir.
Ölkənin maliyyə sektorunda AYİB tərəfindən 70 layihə həyata keçirilib.
AYİB-in Azərbaycanda mövcud portfeli 608 milyon dollardır. AYİB-in ötən il ayırdığı kreditlərin ümumi həcmi 34 milyon dollar olub.