Azərbaycan, Bakı, 5 aprel /Trend, müxbir Ə.Həsənov /
Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) fəaliyyət göstərdiyi müddətdə 12,5 mindən çox sahibkara 720 milyon manat məbləğində güzəştli kredit verib. Trend-in məlumatına görə, bu barədə fondun icraçı direktoru Şirzad Abdulalyevin cümə axşamı "Azərbaycan" qəzetində dərc olunmuş məqaləsində deyilir.
"Həmin vəsaitlərdən 60 faizi aqrar sahənin inkişafına, o cümlədən 80 faizi kənd təsərrüfatı məhsullarının istehsalı və emalına, 20 faizi aqrar sahənin inkişafını stimullaşdıran infrastruktur sahələrin yaradılmasına yönəldilib", - Abdullayev deyib.
Güzəştli kredir vəsaitlərinin 80 faizi respublikanın regionlarının, 20 faizi Bakı qəsəbələrinin payına düşür. Həmin güzəştli kreditlərin hesabına 95 mindən artıq iş yeri açılıb.
"Ölkə iqtisadiyyatının qeyri-neft sektorunun sürətləndirilməsi və və yeni texnologiyaların tətbiqinə əsaslanan layihələrin güzəştli şərtlərlə maliyyələşdirilməsi məqsədilə SKMF son 3 ildə yeni texnologiyalara əsaslanan 185 investisiya layihəsinə 313 milyon manat güzəştli kredit ayırıb. Bu layihələrin ümumi dəyəri 707 milyon manat təşkil edir", - Abdullayev deyib.
Onun sözlərinə görə, bu layihələrdən 48 faizi kənd təsərrüfatı məhsullarının istehsalı və emalına, 20 faizi sənaye məhsullarının istehsalı və emalına, 29 faizi taxıl və soyuducu anbarların yaradılmasına, 3 faizi isə digər sahələrə aiddir. İnvestisiya layihələrinin 88 faizi artıq başa çatıb, digər investisiya layihələri üzrə isə tikinti-quraşdırma işləri davam etdirilir.
Fondun vəsaitləri hesabına 2008-2011-ci illərdə verilmiş güzəştli kreditlər üzrə qaytarılan vəsaitlər hesabına 2008-ci ildə 15 milyon manat, 2009-cu ildə 56 milyon manat, 2010-cu ildə 71 milyon manat, 2011-ci ildə 104 milyon manat sahibkarlıq subyektlərinin investisiya layihələrinin maliyyələşdirilməsinə yönəldilib.
"2012-ci ildə bu göstəricinin 110 milyon manat olacağı planlaşdırılır. Bununla da 2008-ci illə müqayisədə 2012-ci ildə geri qaytarılan kreditlər hesabına verilən güzəştli kreditlərin həcminin 7,3 dəfə artacağı gözlənilir", - fond rəhbəri bildirib.
Abdullayevin sözlərinə görə, 2011-ci ildə sahibkarlıq subyektləri SKMF-nin xətti ilə 138 milyon manat güzəştli kredit alıblar ki, bu da SKMF-nin fəaliyyətinin bütün tarixi ərzində ən yüksək göstəricidir.
"2012-ci ildə bu göstərici artıq 200 milyon manat səviyyəsində planlaşdırılır ki, bundan 110 milyon manatı qaytarılan kreditlər, 90 milyon manatı isə Azərbaycanın dövlət büdcəsindən ayrılan vəsaitlər təşkil edəcək", - Milli Fondun rəhəbri deyib.