Azərbaycan, Bakı, 19 aprel /Trend, müxbir Ə.Həsənov/
2012-ci ilin birinci rübündə Azərbaycanda bütün maliyyə mənbələrindən iqtisadiyyatın və sosial sahələrin inkişafına 2099,4 milyon manat sərmayə qoyulub ki, bu da ötən ilin analoji dövr göstəricisindən 16,5 faiz çoxdur. Bu barədə Trend-ə Dövlət Statistika Komitəsindən məlumat verilib.
Təmir-tikinti işlərinə qoyulan investisiyaların həcmi 1103,7 milyon manat olub ki, bu da investisiyaların ümumi həcminin 52,6 faizini təşkil edib. İstehsalat yönümlü tikinti obyektlərinə 989,7 milyon manat, qeyri-istehsal sahəsindəki obyektlərə isə 1109,7 milyon manat yönəldilib.
İnvestisiyaların ümumi həcmindən 72,8 faiz daxili investisiyaların payına düşür. Daxili investisiyaların böyük hissəsi (72,7 faiz) dövlət müəssisələrinə və təşkilatlara, yalnız 27,3 faizi özəl müəssisələrə qoyulub.
Əsas kapitala qoyulan vəsaitlərin 63,8 faizi (1339,8 milyon manat) ölkədə qeyri-neft sektorunun inkişafına, o cümlədən 4,4 faizi (91,9 milyon manat) qeyri-neft sənayesi, 36,2 faizi (759,6 milyon manat) neft sektorunun inkişafına yönəldilib.
İnvestisiyaların 40,6 faizi sənaye sahəsinin, 4,6 faizi kənd təsərrüfatı, 1,3 faizi ticarət, 21,2 faizi nəqliyyat və anbar təsərrüfatı, 4 faizi rabitə və informasiya, 2,6 faizi səhiyyə, 2,3 faizi təhsil, 6,3 faizi daşınmaz əmlak üzrə əməliyyatların (onların 6,1 faizi mənzil tikintisinin payına düşür), 5,9 faizi istirahət, əyləncə və incəsənətin, 4,6 faizi dövlət idarəçiliyi, 2,9 faizi maliyyə və sığorta fəaliyyəti, 1,9 faizi tikinti, 1,2 faizi, inzibati və yardımçı xidmətlərin göstərilməsinin, 0,6 faizi isə ictimai iaşə və turistlərin yerləşdirilməsinin payına düşür.
Dövlət mülkiyyətində olan müəssisə və təşkilatlara 1181,4 milyon manat, özəl müəssisələrə isə 918 milyon manat ayrılıb.
Müəssisə və təşkilatların vəsaitləri hesabına əsas kapitala 1049,1 milyon manat (investisiyaların ümumi həcminin 50 faizi), bank kreditlərindən 101,9 milyon manat (4,8 faiz), büdcə vəsaitlərindən 848,4 milyon manat (40,4 faiz), büdcədənkənar fondların vəsaitlərindən 37,9 milyon manat (1,8 faiz), əhalinin şəxsi vəsaitlərindən 58 milyon manat (2,8 faiz), digər vəsaitlərdən isə 4,1 milyon manat (0,2 faiz) sərmayə qoyulub.
