Azərbaycan, Bakı, 24 may /Trend, müxbir A.Axundov/
Azərbaycan Estoniyadan sonra postsovet məkanında adambaşına düşən ÜDM-in səviyyəsinə görə dünyanın ilk 50 ölkəsinin siyahısına düşə biləcək ikinci ölkə ola bilər. Bu barədə Milli Məclisin deputatı Əli Məsimli Vergilər Nazirliyinin rəsmi orqanı olan "Vergilər" qəzetində dərc olunmuş müsahibəsində bildirib.
2011-ci ildə Azərbaycanda adambaşına düşən ÜDM-in həcmi 5530,6 manat (7003,4 dollar) təşkil edib.
"Bu məqsədə çatmaq üçün biz ÜDM-in artımını ildə 8-10 faiz səviyyəsində təmin etməliyik. Bunun üçün ÜDM-də investisiyaların xüsusi çəkisinin 40 faizədək artırılması vacibdir", - Məsimli deyib.
Onun sözlərinə görə, zaman keçdikcə ÜDM-in artım sürətində müəyyən azalma təbiidir.
"Hökumət 2012-ci ildə ölkədə ümumi iqtisadi artımı 5,7 faiz səviyyəsində proqnozlaşdırır. Zaman keçdikcə ÜDM-in artımında müəyyən azalmanın baş verməsi təbiidir. Bu, bir sıra obyektiv səbəblərlə yanaşı, həm də neft hasilatının nisbətən aşağı düşməsi ilə bağlıdır. Lakin demoqrafik artım səviyyəsini nəzərə alsaq, Azərbaycanda ÜDM-in artımı illik azı 4 faiz təşkil etməlidir. Əks halda, iqtisadiyyatda durğunluq baş verə bilər. Belə neqativ prosesin baş verməməsi üçün hökumət düzgün olaraq son illərdə qeyri-neft sektorunun inkişafına xüsusi diqqət yetirir. Qeyri-neft sektorundan büdcəyə daxilolmaların ilin birinci rübündə 7,7 faiz artması da bunun nəticəsidir", - Məsimli deyib.
