Azərbaycan, Bakı, 12 iyun /Trend, müxbir A.Axundov/
Azərbaycanın Dövlət Şəhərsalma və Arxitektura Komitəsi şəhərsalma kadastrının yaradılması və fəaliyyət göstərməsi üçün metodoloji sənədlər hazırlayıb. Bu barədə çərşənbə axşamı Trend-ə Dövlət Şəhərsalma və Arxitektura Komitəsinin sədr müavini Dövlətxan Dövlətxanov bildirib.
"Biz şəhərsalma kadastrı adı altında yeni proqram məhsulu yaratmaq istəyirik. Şəhərsalma kadastrı digər kadastrlarla - torpaq, Əmlak Məsələləri üzrə Dövlət Komitəsi kadastrı və s. ilə uyğunlaşacaq. Biz hələlik onu Şirvan şəhəri nümunəsində yaratmaq istəyirik", - Dövlətxanov deyib.
Onun sözlərinə görə, hazırda komitə Şirvan şəhəri üçün şəhərsalma kadastrının yaradılması ilə bağlı tender elan etməyə hazırlaşır. Həmin kadastr gələcəkdə digər əsas şəhərlər üçün model qismində tətbiq ediləcək.
"Hələlik ölkənin regionlarında əsas məlumatların toplanması aparılır. Biz texniki tapşırıqların təfərrüatlarını, yəni məsləhətçilərdən gözlədiyimiz əsas xidmətlər həcmini dəqiqləşdiririk. Respublikada belə kadastrın hələ olmadığını nəzərə alsaq, tenderdə xarici təşkilatların iştirak edəcəyini gözləyirik. Biz istəyirik ki, tenderin qalibləri təkcə bu məhsulun yaradılmasında deyil, həm də müəyyən müddət - təqribən yarım il onları idarə etsinlər. Yəni yerli hakimiyyət orqanlarına onu idarə etməyi öyrətsinlər. Bu iş 2-2,5 il vaxt aparacaq", - Dövlətxanov qeyd edib.