Azərbaycan, Bakı, 15 avqust / Trend, müxbir A.Axundov /
Dünya Bankının (DB) Azərbaycan üzrə yeni ölkə meneceri bankın mütəxəssisi Larisa Leşenko (Larisa Leshchenko) təyin olunub.
Bu barədə Trend-ə çərşənbə günü ölkə hökumətindən məlumat verilib.
DB yaxın vaxtlarda onu ölkə hökumətinə təqdim edəcək.
"Yeni menecer sentyabrın 1-dən vəzifəsinin icrasına başlayacaq", - bankdan deyiblər.
Leşenko Mərkəzi Avropa Universitetində elmi fəaliyyəgtlə məşğul olub, daha sonra DB-nin baş iqtisadçısı, eləcə də bankın Ukraynada və Gürcüstandakı nümayəndəliklərində çalışıb.
DB-nin Azərbaycandakı keçmiş nümayəndəsi Cozef Ouenin səlahiyyət müddəti iyulun sonlarında başa çatıb.
Ölkə meneceri adətən üç illik müddətə təyin olunur, lakin bu müddət dörd ilədək uzadıla bilər.
Cozef Ouen 2010-cu ilin yayından DB-nin Azərbaycandakı nümayəndəsinin səlahiyyətlərini icra edir.Onun sələfi Qreqori Yeceyçak bu vəzifəni dörd il tutub.
