Azərbaycan, Bakı, 11 sentyabr /Trend, müxbir T.Cəfərov/
İran və Azərbaycanın müştərək sərmayəsi ilə Qulibəylu-Xudafərin azad ticarət zonası istifadəyə veriləcək. Trend-in məlumatına görə, bu barədə İRNA agentliyi xəbər verir.
Ötən gün Azərbaycanın İrandakı səfiri Cavanşir Axundov İranın Şərqi Azərbaycan əyalətinin başçısı Əhmədrza Beygi ilə görüşüb. Görüşdə Cavanşir Axundov Azərbaycanın Qulibəylu-Xudafərin azad ticarət zonasında işlərin sürətləndirilməsində maraqlı olduğunu deyib.
"Bu sahədə Azərbaycan hökuməti bütün səylərini göstərir və lazımi işləri görməyə hazırdır", - səfir bildirib.
İranın Şərqi Azərbaycan əyalətinin başçısı Əhmədrza Beygi deyib ki, Qulibəylu-Xudafərin azad ticarət zonasının istifadəyə verilməsi üçün lazımi infrastruktur işləri görülüb, bu zonanın istifadəsi iki ölkə arasında əməkdaşlığı daha da artıracaq.
İran KİV-inin məlumatına görə, İranın Qulibəylu şəhəri və Azərbaycanın Füzuli rayonu arasında tikiləcək bu ticarət zonasında yeni gömrük məntəqəsinin istifadəyə verilməsi, dəmiryol xəttinin çəkilməsi nəzərdə tutulub.
