Azərbaycan, Bakı, 27 sentyabr /Trend, müxbir A.Axundov/
Azərbaycan 2013-cü ildə Avropa İttifaqı ilə viza rejiminin sadələşdirilməsi ilə bağlı danışıqların yekunları üzrə müəyyən nəticələr əldə ediləcəyini gözləyir. Bu barədə cümə axşamı jurnalistlərə Azərbaycan xarici işlər nazirinin müavini Mahmud Məmmədquliyev bildirib.
"Şübhəsiz ki, Avropa İttifaqı ilə viza rejiminin sadələşdirilməsi və readmissiya məsələsi üzrə danışıqlarda müəyyən irəliləyiş var. Biz 2013-cü ildə müəyyən nəticələr əldə edəcəyimizə ümid edirik", - Məmmədquliyev deyib.
Onun sözlərinə görə, noyabrda Bakıda danışıqların üçüncü mərhələsinin keçiriləcəyi gözlənilir.
"Viza rejiminin sadələşdirilməsi əhalinin əsas kateqoriyalarına - tələbələrə, müalicəyə gedən şəxslərə, sahibkarlara aiddir. Ümumilikdə, bu, 10-12-yə yaxın kateqoriyaya şamil edilir və biz onların daha çox olmasına çalışırıq", - Məmmədquliyev qeyd edib.