Azərbaycan, Bakı, 16 noyabr /Trend, müxbir A.Axundov/
Azərbaycan Beynəlxalq Bankı (ABB) özünün ipoteka proqramı çərçivəsində xidmətlərə böyük tələbatın olduğunu müşahidə edir. Trend-in məlumatına görə, bu barədə cümə günü jurnalistlərə ABB-nin idarə heyətinin sədri Cahangir Hacıyev deyib.
"Biz Azərbaycanda bu istiqamətin böyük potensialını və bankımızın xidmətlərinə tələbatın olmasını görürük. Biz, əsasən, iri şirkətlərin işçilərinə ipoteka kreditləri veririk", - Hacıyev vurğulayıb.
Otən il ABB Azərbaycan İpoteka Fondunun xətti ilə 6,6 milyon manat həcmində kredit maliyyələşdirdiyi halda, özünün ipoteka proqramı çərçivəsində mənzil alışının maliyyələşdirilməsinə 7,6 milyon manat ayırıb.
Hacıyevin sözlərinə görə, bankda aktivlər və kredit portfelinin keyfiyyəti ilə bağlı vəziyyət yaxşıdır.
"Bankda ehtiyatda saxlama səviyyəsi yaxşıdır və hətta auditorun tələbini 50-60 milyon manat üstələyir ki, bu da bankın aktivlərinin və kredit portfelinin keyfiyyətindən xəbər verir", - o deyib.
