Azərbaycan, Bakı, 27 noyabr /Trend, müxbir A.Axundov/
2012-ci ildə Azərbaycan sığorta bazarının bank xidmətləri ilə təklif edilən məhsullardan asılılığının azalması müşahidə edilir.
Trend-in məlumatına görə, bu barədə çərşənbə axşamı jurnalistlərə Maliyyə Nazirliyi yanında Dövlət Sığorta Nəzarəti Xidmətinin sədri Namiq Xəlilov deyib.
"Sığorta bazarı bank bazarı ilə əlaqəlidir, lakin bu il icbari sığortanın inkişafı və digər amillərlə əlaqədar olaraq, sığorta bazarının bankların göstərdiyi biznesdən asılılığı azalır. Pərakəndə və topdan satışın inkişafı ilə bu asılılıq azalmaqda davam edəcək", - Xəlilov qeyd edib.
Onun sözlərinə görə, eyni zamanda bankların özləri bu prosesdə maraqlı olmalıdırlar, çünki beynəlxalq praktikada sığorta məhsullarının satışı bankların əsas faizsiz gəlir mənbələrindən biridir.
"Bu, xüsusən də əksər banklarımızın hazırda təqribən bütün gəlirlərinin faizli gəlirlər olduğunu nəzərə alsaq, banklar üçün vacib məqamdır", - Xəlilov vurğulayıb.
