Azərbaycan, Bakı, 29 noyabr /Trend, müxbir A.Axundov/
Azərbaycan Maliyyə Nazirliyi yanında Dövlət Sığorta Nəzarəti Xidməti 2012-ci il ərzində sığorta şirkətlərinin əsassız olaraq ödəməkdən imtina etdikləri 300 min manatdan artıq vəsaitin ödənilməsini təmin edib. Bu barədə Trend-ə Dövlət Sığorta Nəzarəti Xidmətinin rəisi Namiq Xəlilov deyib.
Onun sözlərinə görə, 2012-ci ilin ötən dövrü ərzində Dövlət Xidmətinə sığorta şirkətləri ilə bağlı 300-dən artıq şikayət daxil olub.
"2012-ci ildə icbari sığorta üzrə 700 mindən çox insan sığortalanıb, 4 mindən artıq hadisəyə görə sığorta ödənişi həyata keçirilib. Şikayətlər hər yerdə, o cümlədən sığorta sisteminin inkişaf etdiyi ölkələrdə olur", - Xəlilov bildirib.
Onun sözlərinə görə, sığortalıların şikayətləri əsasən dəymiş zərərin hesablanması ilə bağlı olur.
"Şirkətin dəymiş zərəri ödəməkdən imtina etməsi ilə bağlı praktiki olaraq şikayət yoxdur", - Xəlilov vurğulayıb.
