Azərbaycan, Bakı, 3 dekabr /Trend, müxbir E.İsmayılov /
Hazırda Azərbaycanda Bakı buxtasının iki qurtaracağının birləşdirilməsinin üç variantı nəzərdən keçirilir. Trend-in məlumatına görə, bu barədə bazar ertəsi jurnalistlərə Azərbaycanın nəqliyyat nazirinin müavini Musa Pənahov bildirib.
"Birinci variant körpünün tikilməsi prosesinin özünü, ikincisi sualtı tuneli və üçüncüsü isə bu iki konsepsiyanın birləşdirilməsini nəzərdə tutur", - Pənahov deyib.
Bakı buxtası üzərindən körpünün tikilməsinin texniki-iqtisadi əsaslandırılmasının (TİƏ) hazırlanması haqqında protokol 2009-cu ilin sonunda Nəqliyyat Nazirliyi ilə Koreya Beynəlxalq Əməkdaşlıq Agentliyi - KOICA arasında imzalanıb. İlkin hesablamalara görə, körpünün dəyəri 2,5 milyard dollara yaxın təşkil edir.
Koreya Respublikası hökuməti 2009-2011-ci illərdə KOICA layihəsinin reallaşdırılmasına 1,6 milyon dollar ayırıb.
Yeni körpü Bakı buxtasının iki tərəfini (Bayıl və Zığ qəsəbələri zonasında) birləşdirməli və paytaxtın nəqliyyat infrastrukturunun yükünün azaldılmasına kömək etməlidir. Körpünün dəniz hissəsi 14 kilometr təşkil edəcək. Bu körpünün tikintisi üzrə işlərin 5 il ərzində başa çatdırılması planlaşdırılır.
Bakıda Dənizkənarı Bulvar boyu salınacaq yeraltı tunelin uzunluğu isə 4,2 kilometr təşkil edəcək.
Layihə təklifinə əsasən, tunelin 0,9 kilometrlik hissəsi yerin üstü ilə uzanacaq və U formasında olacaq. Tunelin 2,3 kilometrlik hissəsi qutu formasında və qalan hissəsi arka formasında olacaq.
Tunel altızolaqlı (hər tərəfdə üç) olacaq. Layihəyə uyğun olaraq, tunelin çəkilişi zamanı 0,7 kvadrat kilometrlik sahədə sahilbərkitmə, altı milyon kubmetr həcmində ərazinin doldurulması, 3,7 kilometr uzunluğunda sahilbərkitmə işləri görüləcək.
Layihəyə görə, tunel 1,8 m-dən 5,5 metrədək dərinlikdə olacaq. Neftçilər prospektinə iki çıxışa malik olacaq tunel Bayıl qəsəbəsindən başlayaraq Zığ qəsəbəsində qurtaracaq.
