Azərbaycan, Bakı, 23 yanvar /Trend, müxbir T.Cəfərov/
İran və Azərbaycan Gömrük komitələrinin rəis müavinlərinin görüşündə iki ölkənin sərhəd-keçid məntəqələrində vahid pəncərə sistemindən istifadə olunması məsələsi müzakirə olunub və razılıq əldə olunub. Bunu İran İslam Respublikasının Azərbaycandakı səfiri Möhsün Pakayin Trend-ə müsahibəsində deyib.
Pakayin bildirib ki, iki ölkənin sərhəd-keçid məntəqələrində vahid pəncərə sistemindən istifadə etməklə gömrük prosedurları tezləşəcək, iki ölkə arasında gediş-gəliş və mal mübadiləsi sürətləndiriləcək və ümid edirik yaxın bir il ərzində iki ölkə arasında vahid pəncərə sistemi istifadəsinə başlanacaq.
Səfir əlavə edib ki, iki ölkə arasında ticarət dövriyyəsinin həcmi 500 milyon dollardır və hər il 1 milyon sərnişin sərhədlərdən gediş-gəliş edir.
"Gömrük sahəsində əməkdaşlıqların artırılması və gömrük prosedurlarının sadələşdirilməsi iki ölkə arasında ticarətin inkişafına və sürətlənməsinə, narkotiklərlə və qaçaqmalçılıqla mübarizəyə zəmin yaradacaq", - Pakayin deyib.
Səfir bildirib ki, yanvarın 22-də keçirilən görüşdə İran və Azərbaycan gömrükçüləri əlaqələrin inkişafının və sərhəd-keçid məntəqələrindəki mövcud problemlərin həllinin zəruriliyini vurğulayıblar.
"Astara sərhəd keçid məntəqəsi İran və Azərbaycanın güzgüsüdür. Son zamanlar bu sərhəd-keçid məntəqəsindən gediş-gəliş artıb, buna görə də mövcud problemlərin aradan qaldırılması vacibdir", - Pakayin qeyd edib.
Ötən gün Astara (Azərbaycan) şəhərində İran və Azərbaycan Gömrük komitələrinin rəis müavinlərinin görüşü keçirilib. Görüşdə sərnişinlərin gediş-gəlişində və malların daşınmasında gömrük prosedurlarının sadələşdirilməsi və ticarət mübadilələrinin artırılması məqsədilə sərhəd-keçid məntəqələrində mövcud problemlərin həlli məsələləri müzakirə olunub. Gömrük komitələri arasında əməkdaşlığın genişləndirilməsi məqsədilə müqavilə imzalanıb.