Azərbaycan, Bakı, 21 may /Trend, müxbir A.Axundov/
I rüb ərzində qeyri-nağd pul kütləsi 4,6 faiz, ötən ilin müvafiq dövrünə nəzərən isə 11,1 faiz artıb ki, bu da bank sisteminə etimadın artırılması istiqamətində görülmüş işlərin nəticəsidir. Trend-in məlumatına görə, bu barədə Azərbaycan Mərkəzi Bankının yanvar-mart ayları üzrə pul siyasəti icmalında deyilir.
Üç ay ərzində geniş pul kütləsi iqtisadiyyatın tələbatına uyğun olaraq artıb və onun strukturunda yaxşılaşma prosesi davam edib. Rüb ərzində manatla geniş pul kütləsi 0,2 faiz artıb.
Bu dövr ərzində pul bazası isə 3,6 faiz azalaraq 10,1 mlrd. manat təşkil edib. Pul bazasının dinamikasında kəskin volatillik olmayıb, yalnız ötən ilin dekabr ayında büdcə xərcləri ilə əlaqədar artımın sürətlənməsi müşahidə olunub.
Mövsümi təmizlənmiş pul bazası ilin əvvəlinə nəzərən 5%, ötən ilin müvafiq dövrünə nəzərən isə 24,4% artım nümayiş etdirib.
2013-cü il aprelin 1-nə geniş pul kütləsi (M3) ilin əvvəlinə nəzərən 0,5%, ötən ilin müvafiq ayına nəzərən isə 17,8% artaraq 16 863,7 milyon manata çatıb. Manatda geniş pul kütləsi (M2) ilin əvvəlinə nisbətdə 0,23 faiz artaraq 13,84 mlrd. manat təşkil edib.
