Azərbaycan, Bakı, 11 iyul /Trend, müxbir E.İsmayılov/
"Azərbaycan Hava Yolları" QSC 2013-cü ilin sentyabr ayının ilk ongünlüyündə uçuş coğrafiyasının inkişafı məqsədilə Bakı-Pekin/Pekin-Bakı marşrutu üzrə birbaşa reyslərin həyata keçirilməsinə başlamaq niyyətindədir. Bu barədə Trend-ə QSC-dəki mənbə bildirib.
Daha əvvəl mayın 10-da Çinə yeni reysin açılacağı gözlənilirdi, lakin Çin tərəfinin QSC qarşısına qoyduğu yeni tələblərlə əlaqədar reysin açılışı təxirə salındı.
Uçuşlar həftədə iki dəfə - çərşənbə axşamı və cümə günləri "Airbus А340" və "Boeing 767" təyyarələri vasitəsilə həyata keçiriləcək.
Mənbə qeyd edib ki, bütün məsələlər razılaşdırılıb və artıq sentyabrda reys açılacaq".
