Azərbaycan, Bakı, 16 sentyabr /Trend, müxbir H.Vəliyev/
2013-cü ilin yanvar-avqust aylarının yekunu üzrə Azərbaycanın metallurgiya sənayesi və hazır metal məmulatları istehsal edən müəssisələri tərəfindən 259,9 milyon manat məbləğində məhsul istehsal edilib və xidmət göstərilib. Trend-in məlumatına görə, bu barədə Dövlət Statistika Komitəsinin hesabatında deyilir.
Metallurgiya sənayesində istehsalın həcmi 3,6 faiz artıb, hazır metal məmulatlarının istehsal həcmi isə 49 faiz azalıb.
Yanvar-avqust aylarının yekunları üzrə tökmə çuqun istehsalı 1,4 min ton təşkil edib ki, bu da 2012-ci ilin analoji dövr göstəricisindən iki dəfə çoxdur. Bu dövrdə 49,1 min ton boru istehsal edilib ki, buda ötən ilin analoji dövründə qeydə alınan göstəricidən 15,5 faiz çoxdur.
2013-cü ilin yanvar-fevral aylarının yekunlarına görə, qara metallardan hazırlanan yarımfabrikatların ixrac həcmi 56,8 min ton (28 milyon dollardan çox) təşkil edib ki, bu da 2012-ci ilin analoji dövr göstəricisindən 33,7 faiz (pulla ifadədə 37,6 faiz) azdır.
Qara metallardan hazırlanan boruların ixracı 38,5 min ton (37,2 milyon dollardan çox) təşkil edib ki, bu da 2012-cu ilin müvafiq dövr göstəricisindən 35,4 faiz (pulla ifadədə 36,9 faiz) çoxdur.
Bu dövrdə ölkədə armatur istehsalı 158,2 min ton təşkil edib ki, bu da ötən ilin analoji dövründə qeydə alınan göstəricidən 1,1 faiz çoxdur.