Azərbaycan, Bakı, 12 dekabr /Trend, müxbir E.Əliyev/
2013-cü ilin 10 ayının yekunları üzrə Azərbaycan banklarının depozit bazası 12,5 faiz, illik hesablamada isə 18 faiz artıb. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Noyabrın 1-nə olan məlumata görə, bank depozitlərinin, hüquqi və fiziki şəxslərin əmanətlərinin ümumi həcmi 2013-cü ilin əvvəlinə olan 10699,2 milyon manata və 2012-ci ilin analoji dövründə qeydə alınan 11 929,4 milyon manata nisbətdə 12 042,3 milyon manat təşkil edib.
Ümumi həcmin 6 130,1 milyon manatı manatla vəsaitlərin payına düşüb ki, bunun da 2199 milyon manatını tələb olunanadək depozitlər, 3931,1 milyon manatını isə müddətli depozitlər təşkil edir. Xarici valyutadakı vəsaitlərin payına 5 912,1 milyon manat (müvafiq olaraq 1 628,2 milyon manat və 4 283,9 milyon manat) düşüb.
Ötən ilin analoji dövrü ilə müqayisədə fiziki şəxslərin əmanətləri 34,4 faiz, hüquqi şəxslərin depozitlərinin həcmi isə cüzi, yəni 4,09 faiz artıb.
2013-cü ilin yanvar-oktyabr aylarında dekabrın əvvəlinə fiziki şəxslərin ölkənin banklarındakı əmanətlərinin həcmi 2012-ci ilin analoji dövründəki 4 689,7 milyon manata nisbətdə 6 303,4 milyon manat təşkil edib.
Mərkəzi Bankın məlumatına görə, əhali tərəfindən 3 865,8 milyon manat (61,3 faiz) milli valyutada, 2 437,5 milyon manat isə SDV-də yerləşdirilib.
2013-cü ildə banklarda Azərbaycan əhalisinin milli valyutada pul əmanətlərinin xarici valyutadakı əmanətlər üzərində üstünlüyü saxlanılıb. Müqayisə üçün, 2012-ci ilin 10 ayının nəticələrinə görə, əhali tərəfindən 2 704,3 milyon manat (57,6 faiz) vəsait milli valyutada, 1 985,4 milyon manat SDV-də yerləşdirilib.
2013-cü ilin yanvar-oktyabr aylarının nəticələrinə görə, maliyyə təşkilatlarının depozitlərinin həcmi 3 067,8 milyon manat təşkil edib. Bu rəqəm 2012-ci ilin analoji dövründə 2 732,5 milyon manat olub.
Dekabrın əvvəlinə qeyri-maliyyə təşkilatlarının depozitlərinin həcmi 2 671 milyon manat təşkil edib. Bu rəqəm 2012-ci ilin 10 ayının yekunları üzrə 2780,3 milyon manat olub.
Hüquqi şəxslərin depozitlərinin həcmi 5738,8 milyon manat təşkil edib. Bu göstərici 2012-ci ilin analoji dövründə 5512,8 milyon manat olub.
Qeyd edək ki, Azərbaycanda 43 bank fəaliyyyət göstərir.