Azərbaycan, Bakı, 3 fevral /Trend, müxbir A.Axundov/
2013-cü ildə Bakıda torpaq sahəsinin qiyməti 4,22 faiz azalıb. Ötən ilin yanvar ayında 1 sot torpağı orta hesabla 18 min dollara, dekabrda isə 17 240 dollara əldə etmək mümkün idi. Bunu bazar ertəsi Trend-ə "MBA Group" konsaltinq şirkətinin baş direktoru Nüsrət İbrahimov deyib.
O, hesab edir ki, 2014-cü ildə torpağın qiyməti əsasən dəyişməyəcək və ötən ilin səviyyəsində qalacaq.
N.İbrahimov bildirib ki, ötən ilin I yarısında qiymətlər artım tendensiyası nümayiş etdirib və iyunda 20 min dollar (orta hesabla 1 sota görə) səviyyəsini ötüb, lakin sonra qiymətlər aşağı düşüb.
Onun sözlərinə görə, ilin II yarısında müşahidə edilən qiymət azalması dekabradək davam edib: "Bu cür vəziyyəti tikinti üçün xarakterik olmayan ayların başlaması və torpaq bazarında fəallığın azalması ilə izah etmək olar. İlin soyuq aylarında torpağa tələbat azalır ki, bu da nəticədə bağlanan sövdələşmələrin sayının azalmasına və qiymətlərin aşağı düşməsinə gətirib çıxarır".
Xarakterik olmayan mənzərə paytaxtın Nərimanov, Nəsimi və Suraxanı rayonlarında da müşahidə edilib, həmin rayonlarda ilin son aylarında torpağın qiyməti bahalaşıb. Ekspert qeyd edib ki, torpağın qiyməti, əsasən, şəhərin mərkəzdən kənar rayonlarında ucuzlaşıb.
Təsadüfi deyil ki, ən bahalı torpaq sahəsi (1 sot torpağa görə 178 min dollar) məhz Nərimanov rayonunda, ən ucuz torpaq sahəsi (1 sota görə 383 dollar) isə Abşeron rayonunun Masazır qəsəbəsində təklif edilib.
