Azərbaycan, Bakı, 3 fevral /Trend, müxbir A.Axundov/
2013-cü il ərzində təkrar mənzil bazarında 1 kvadratmetr sahənin qiyməti təqribən 20 faiz bahalaşıb. Bunu bazar ertəsi Trend-ə "MBA Group" konsaltinq şirkətinin baş direktoru Nüsrət İbrahimov deyib.
Onun sözlərinə görə, dekabrda Bakının təkrar mənzil bazarında 1 kvadratmetr sahənin orta qiyməti 1807 dollar təşkil edib, ötən ilin yanvarında isə bu rəqəm 1508 dollar olub.
İlin sonuna təkliflər portfelində bahalı evlərin payı 45,42 faiz, ucuz evlərin payı isə 54,58 faiz təşkil edib.
Portfelin böyük hissəsi (35,9 faiz) 85-95 min dollar dəyərində olan mənzillərin payına düşüb. Mənzillərin orta hesabla sayı 2,59, hər bir otağın orta hesabla qiyməti 63 617 dollar, mənzillərin orta hesabla qiyməti isə 164 768 dollar təşkil edib.
N.İbrahimov bildirib ki, təkrar mənzil bazarında mənzillərin qiymətinin artımı davam edəcək və 2014-cü ildə artımın 10-12 faiz olacağı gözlənilir.
