Azərbaycan, Bakı, 14 may /Trend, müxbir E.Əliyev/
Azərbaycan Milli Məclisi cari ildə özəl sahibkarların depozitlərinin sığortalanması məsələsinə baxa bilər. Bunu çərşənbə günü Trend-ə Azərbaycan Əmanətlərin Sığortalanması Fondunun (ADIF) icraçı direktoru Azad Cavadov deyib.
Onun sözlərinə görə, müvafiq təkliflər paketi ADIF tərəfindən hazırlanıb və Milli Məclisə təqdim olunub: "Paketə baxılma və bu təkliflərin qəbulu üzrə konkret müddət tamamilə deputatlardan asılıdır".
A.Cavadov qeyd edib ki, hazırda ADIF yalnız fiziki şəxslərin əmanətlərini sığortalayır: "Hüquqi şəxslərin depozitlərinin sığortalanması imkanı gündəlikdə yoxdur".
Onun sözlərinə görə, ADIF genişlənməyə davam edir: "I rübün yekunları üzrə fondun aktivləri 79,7 milyon manat olub. Aktivlərin həcmi ötən ilin analoji dövrü ilə müqayisədə təqribən 20 milyon manat artıb".