Azərbaycan, Bakı, 24 iyul /Trend, müxbir Zülfiyyə Qurbanova/
2014-cü ilin yanvar-iyun aylarında Gürcüstanın ixracında Azərbaycanın payı 20,4 faiz təşkil edib. Trend-in məlumatına görə, bu barədə Gürcüstan Milli Statistika Xidmətinin bu ilin birinci yarısının yekunlarına dair hesabatında deyilir.
Hesabatda bildirilir ki, 2014-cü ilin yanvar-iyun aylarında Gürcüstandan Azərbaycana 290,2 milyon dollarlıq məhsul ixrac olunub. Azərbaycana ixrac 2013-cü ilin analoji dövrü ilə müqayisədə 12,8 faiz azalıb. Müqayisə üçün: ötən ilin yanvar-iyun aylarında Azərbaycana 332,8 milyon dollar dəyərində Gürcüstan malları ixrac olunmuşdu.
Gürcüstandan Azərbaycana ixracın strukturunda əsas yeri minik avtomobilləri, iribuynuzlu mal-qara, tibbi avadanlıqlar, sement, polad armaturlar və digər məhsullar təşkil edir.
Hesabatda deyildiyi kimi, bu göstərici üzrə ikinci yeri Ermənistan tutur. İlin əvvəlindən bu ölkəyə 156,1 milyon dollar dəyərində (ixracın ümumi həcminin 11 faizi) Gürcüstan malları ixrac olunub.
Gürcüstan mallarının ixrac həcmi üzrə üçüncü yeri Rusiya tutur. 2014-cü ilin yanvar-iyun aylarında Gürcüstandan Rusiyaya 134,1 milyon dollar dəyərində (ixracın ümumi həcminin 9,4 faizi) məhsul ixrac olunub.
Bu ilin birinci yarısında Gürcüstanla Azərbaycan arasında əmtəə dövriyyəsi 584,3 milyon dollar (Gürcüstanın xarici ticarət əməliyyatlarının ümumi həcminin 10,7 faizi) təşkil edib ki, bu da ötən ilin analoji dövrünün göstəricisindən 3,7 faiz azdır. Müqayisə üçün: 2013-cü ilin yanvar-iyun aylarında iki ölkə arasında əmtəə dövriyyəsi 605,98 milyon dollar olub.