Azərbaycan, Bakı, 7 avqust /Trend/
Azərbaycanda ödəniş kartlarının sayı ilin əvvəlindən 5,8 faiz artaraq 2014-cü il iyun ayının yekunu üzrə 6003 min ədədə çatıb. 2013-cü ilin müvafiq dövrünün göstəricisi ilə müqayisədə kartların sayı 13,2 faiz artıb. Trend-in məlumatına görə, bu barədə Azərbaycan Mərkəzi Bankının (AMB) 2014-cü ilin I yarısının nəticələri üzrə hesabatında deyilir.
Kartların ümumi sayından 2556 min ədəd sosial kartlara, 4859 min ədədi debet kartlara, 1401 min ədəd əməkhaqqı, 902 min ədəd isə digər kartlara aiddir. Kredit kartlarının miqdarı 1144 min ədəd təşkil edib.
AMB-nin hesabatına əsasən, yanvar-iyunda bankomatların və POS-terminalların köməyi ilə ödəniş kartları üzrə ümumi dövriyyə 5,634 milyard manat, əməliyyatların ümumi sayı isə 37,93 milyon ədəd təşkil edib.
Debet kartlar üzrə əməliyyatların sayı 29,93 milyon ədəd olmaqla 4,55 milyard manat təşkil edib.
Debet kartlar üzrə əməliyyatların ümumi miqdarından ölkə daxilində bankomatların köməyi ilə 4,11 milyard manat məbləğində 24,18 min əməliyyat, POS-terminallar vasitəsilə isə 285 milyon manat dəyərində 1,8 milyon əməliyyat həyata keçirilib.
2014-cü ilin yanvar-iyun aylarında kredit kartları üzrə 1,087 milyard manat məbləğində 8,005 milyon əməliyyat aparılıb. Kredit kartları üzrə əməliyyatların ümumi sayından bankomatların köməyi ilə 569 milyon manat məbləğində 2,47 milyon əməliyyat, POS-terminallarla 240 milyon manatlıq 3,64 milyon əməliyyat aparılıb.
2014-cü il iyulun 1-nə ölkədə 2476 bankomat fəaliyyət göstərib ki, onlardan 1389 ədədi Bakıda, 1087 ədədi isə bankomatların digər şəhər və rayonlarda yerləşir. İl ərzində onların ümumi sayı (2013-cü ilin iyulun əvvəli ilə müqayisədə) 125 ədəd və ya 5,3 faiz artıb.
2014-cü il iyulun 1-nə POS terminalların sayı 52413 ədəd təşkil edib ki, bunun 37079 ədədi Bakıda, 15334 ədəd isə digər şəhər və rayonlarda yerləşib. 2013-cü ilin yanvar-iyun ayları ilə müqayisədə POS-terminalların sayı 15247 ədəd və ya 41 faiz artıb.
