Azərbaycan, Bakı, 16 sentyabr /Trend, müxbir Hüseyn Vəliyev/
2014-cü ilin yanvar-avqust aylarının yekunu üzrə Azərbaycanın metallurgiya sənayesi və hazır metal məmulatları istehsal edən müəssisələri tərəfindən 262,4 milyon manat məbləğində məhsul istehsal edilib və xidmət göstərilib. Trend-in məlumatına görə, bu barədə Dövlət Statistika Komitəsinin 8 ayın yekunları üzrə hesabatında deyilir.
Metallurgiya sənayesində istehsalın həcmi ötən ilin analoji dövründə qeydə alınan göstəriciyə nisbətən 9,2 faiz azalıb, hazır metal məmulatlarının istehsal həcmi isə 12,5 faiz artıb.
Yanvar-avqust aylarının yekunları üzrə tökmə çuqun istehsalı 827 ton təşkil edib ki, bu da 2013-cü ilin analoji dövr göstəricisindən 40,4 faiz azdır. Bu dövrdə 21,6 min ton polad boru istehsal olunub ki, bu da ötən ilin eyni dövründəki göstəricidən 56 faiz az olub.
Göstərilən dövrdə ölkədə armatur istehsalının həcmi 137,2 min ton təşkil edib ki, bu da ötən ilin eyni dövründə olan göstəricidən 18,6 faiz azdır.
Qara metallardan hazırlanan boruların ixracı 20 404,1 ton (20,9 milyon dollardan çox) təşkil edib ki, bu da 2013-cü ilin müvafiq dövr göstəricisindən 47 faiz (pulla ifadədə 43,8 faiz) azdır.