Azərbaycan, Bakı, 14 oktyabr /Trend/
Oktyabrın 13-də iqtisadiyyat və sənaye naziri Şahin Mustafayev ölkəmizdə səfərdə olan İran İslam Respublikasının Radio-Televiziya Təşkilatının sədri İzzətullah Zərqamini qəbul etmişdir.
Nazirlikdən Trend-ə bu gün verilən məlumata görə, nazir Şahin Mustafayev ölkələrimiz və xalqlarımız arasında dostluq münasibətlərinin dərin tarixi köklərə əsaslandığını, əlaqələrimizin inkişafında qarşılıqlı səfərlərin və keçirilən görüşlərin əhəmiyyətini vurğulamışdır.
Qeyd edilmişdir ki, Azərbaycanda qonşu İranla əlaqələrin genişlənməsinə xüsusi önəm verilir. Təsadüfi deyildir ki, bu ilin 9 ayında dövlət başçıları Davos, Tehran və Həştərxanda olmaqla 3 dəfə görüşmüş, əməkdaşlığın genişləndirilməsi perspektivlərini müzakirə etmişlər. Bu görüşlərdə aparılan danışıqlar, müxtəlif sahələrdə imzalanmış sənədlər Azərbaycan-İran əlaqələrinin inkişafına mühüm töhfəsini verir. Azərbaycan və İran arasında siyasi əlaqələrin yüksək səviyyədə olması iqtisadi münasibətlərin inkişafına böyük imkanlar yaradır. Bunun nəticəsidir ki, ölkələrimiz arasında iqtisadi əməkdaşlıq genişlənir, iş adamları arasında əlaqələr inkişaf edir.
Şahin Mustafayev ölkələrimiz arasında müxtəlif sahələrdə əlaqələrin inkişafında Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının fəaliyyətini qeyd etmiş, bu ilin avqust ayında komissiyanın Bakıda keçirilmiş 9-cu iclası çərçivəsində bir sıra sahələrdə əməkdaşlığın inkişafına dair razılıq əldə edildiyini diqqətə çatdırmışdır. Bank, ticarət, gömrük, kənd təsərrüfatı, turizm, rabitə və İKT və s. sahələrdə əməkdaşlığın inkişafı üçün geniş imkanların olduğunu vurğulayan Şahin Mustafayev Dövlət Komissiyasının həmsədri kimi radio-televiziya sahəsində də əlaqələrin genişləndirilməsinə hər cür dəstək göstəriləcəyini bildirmişdir.
İran İslam Respublikasının Radio-Televiziya Təşkilatının sədri İzzətullah Zərqami səmimi qəbula görə təşəkkür etmiş, ölkəsində televiziya və radio yayımının təşkili və inkişafı üçün görülən işlər barədə məlumat vermişdir. İzzətullah Zərqami bu sahədə Azərbaycanın peykindən istifadə edilməsi niyyətini bildirmiş, İranın rəqəmsal ötürücü stansiyalar istehsal etdiyini vurğulayaraq, bu ötürücülərdən Azərbaycanda da istifadə edilməsi təklifinin aidiyyəti qurumlara təqdim edildiyini diqqətə çatdırmışdır.
Görüşdə xalqlarımızın ənənələrinin, malik olduqları dəyərlərin qorunması və təbliğində televiziya və radionun əhəmiyyəti qeyd edilmiş, bu sahədə əməkdaşlığın faydalı olacağı vurğulanmışdır.
Görüşdə İran İslam Respublikasının Azərbaycan Respublikasındakı səfiri Möhsün Pakayin iştirak etmişdir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
