Bakı. Trend:
"Rusiya Dəmir Yolları" İran, Hindistan və Azərbaycanla "Şimal-Cənub" beynəlxalq nəqliyyat dəhlizinin logistik operatorunun yaradılması məsələlərini müzakirə edir.
Trend-in məlumatına görə, bunu jurnalistlərə "Rusiya Dəmir Yolları"nın baş direktorunun müavini Aleksandr Mişarin deyib:
"Biz hazırda belə bir operatorun yaradılması variantlarını müzakirə edirik. Bu, Rusiya-İran hökumətlərarası komissiyasında təqdim edilib. Bu gün biz bununla bağlı iranlı, eləcə də azərbaycanlı həmkarlarımızla danışıqlar aparırıq".
Mişarinin sözlərinə görə, Hindistanla da danışıqlar aparılır.
Qeyd edək ki, "Şimal-Cənub" nəqliyyat dəhlizi Şimali Avropanı Cənub-Şərqi Asiya ilə birləşdirməyə, o cümlədən Azərbaycan, İran və Rusiyanın dəmir yollarını birləşdirməyə yönəlib. Birinci mərhələdə, dəhliz vasitəsilə ildə 5 milyon, daha sonra isə 10 milyon tondan çox yük daşınması nəzərdə tutulur.