Avropa İttifaqının icraçı orqanı olan Avropa Komissiyası (AK) Ərzaq Təhlükəsizliyi Proqramı (ƏTP) çərçivəsində Azərbaycanda dəyəri 9,5 milyon avro olan 2002-ci il maliyyə proqramının 2-ci mərhələsini həyata keçirməyə başlayıb. Proqramın işçi qrupundan Trend xəbər agentliyinə verilən məlumata görə, proqramın 2-ci mərhələsi Azərbaycan hökuməti ilə Avropa Komissiyası arasında bu ilin iyulunda imzalanmış memorandum əsasında həyata keçirilir. Bu mərhələ üzrə nəzərdə tutulan 9,5 milyon avro həcmində vəsait 2 tranşda (4,5 milyon və 5 milyon avro) ayrılacaqdır. Bu hökumət tərəfindən proqramın icrası ilə bağlı bir sıra şərtlərin (yoxsulluğun ixtisarı, iqtisadi islahatların aparılması və s.) yerinə yetirilməsi nəticəsində mümkün olacaqdır. Ümumilikdə 9,5 milyon avronun gələn ilin iyununa kimi ayrılması nəzərdə tutulur. Ayrılacaq vəsait birbaşa dövlət büdcəsinə köçürüləcək və bununla da 2002-ci ilin maliyyə proqramının 2-ci mərhələsinin icrası başa çatmış olacaqdır. Bu proqramın da icrası başa çatdıqdan sonra ƏTP-nin davam etdirilməsi ilə bağlı AK və Azərbaycan hökuməti arasında danışıqlar aparılacaqdır.
Qeyd edək ki, bundan əvvəl isə ƏTP çərçivəsində dəyəri 9,5 milyon avro olan 2002-ci il maliyyə proqramının 1-ci mərhələsi həyata keçirilmişdir.
Xatırladaq ki, ümumi dəyəri 73,5 milyon avro olan, 6 proqramı əhatə edən və icrasına 1996-cı ildən başlanan Avropa Komissiyasının ƏTP çərçivəsində Azərbaycana bu günə qədər təmənnasız 64 milyon avro vəsait ayrılmışdır. Artıq indiyədək 5 proqram icra olunmuşdur. İlkin mərhələdə yardım ərzaq formasında göstərilmişdir. Bu gün isə yardım xarici valyuta şəklində hökumətdə struktur islahatlarının həyata keçirilməsinə yönəldilir.