Azərbaycanın məhkəmə sisteminin müasirləşdirilməsi məqsədilə Dünya bankı Azərbaycan hökuməti ilə birgə layihənin hazırlanmasına başlayıb. Bankın Bakı nümayəndəliyindən Trend ə verilən məlumata görə, dövlət sektorunu idarəetmə üzrə aparıcı mütəxəssis Valid Malekin rəhbərlik etdiyi DB missiyası Bakıdadır.
Bank bu sistemdə islahatların aparılması istiqamətində ilk dəfə maliyyə vəsaiti ayıracaq. Bu layihəyə DB-nin Azərbaycan hökuməti ilə yeni tərəfdaşlıq strategiyası da daxildir. Bu məqsədlə Beynəlxalq İnkişaf Assosiasiyasının kredit ehtiyatlarından $20 mln vəsaitin ayrılması nəzərdə tutulur.
Missiyanın səfəri fevralın 22-dək davam edəcək. Hazırda missiya Ədliyyə nazirliyində, Ali məhkəmədə və digər dövlət orqanlarında, o cümlədən ölkədə belə layihələrin həyata keçirilməsinə cəlb olunmuş digər donorlarla görüşlər keçirir.
